近排銀行特別多搞作，噚日就輪到東亞銀行灣仔分行喬遷之喜，搵咗董事羅友禮剪綵，主席兼行政總裁李國寶就梗唔少得，重有執行董事李福善，同埋太子爺李民橋！寶哥哥同華華講，佢聖誕會去埃及度假一個禮拜，呢個地方佢想去好耐，但咁多年都去唔成，今次終於可以睇到金字塔。
華華又幫東亞員工問咗佢哋最關心嘅加人工同埋花紅問題，寶哥哥話佢自己都想加人工，但就未知有定冇；花紅就一定有，幾多個月就唔講得住啦！
對於加息，李主席話希望部份銀行會追加番啲息，令到間間行嘅P都一樣，唔好再有兩個P啦！人民幣方面，佢個人就好有信心，認為升值只係時間上嘅問題，重話預期會喺農曆年前，事關大時大節前升值係慣例喎！
近日曾特首頻頻為政改方案護航，寶哥哥就話市民上唔上街都冇問題，香港係有自由嘅，不過佢就擔心成日講嘅話，會影響到國際社會對香港嘅睇法，至於政改通唔通過，佢就拋低一句——「五五波」啦！
李華華