前日尾市期指帶住個市落，死死吓，長和系成為開刀對象，但昨日長和系則生龍活虎，恒指彈升130點，期指急升250點，高水87點。驚住周日遊行而喺低位沽貨離場者，呱呱叫。
領匯（823）再升6.2%，其他有收租質哋嘅地產股，亦都似模似樣。有膽嘅，追買地產股C輪，但見啲輪價升得急，心理上追唔落手。
中石化C輪9525：中石化（386）調整完畢，又再升過，輕輕進帳兩格，個別槓桿率較大嘅C輪，例如9395，就彈升25%，例牌交投似有還無。
轉身快，揀9525短炒。隻輪明年5月初夠鐘，輪價19.1仙，溢價14.6%，槓桿率18.5倍（有效7.4倍），引伸波幅32.8%。隻輪溢價的確唔低，但有唔錯嘅槓桿率，買賣又易，炒三朝兩日啱晒。講數據，9214靚啲，但交投較遜。
9214輪價0.33元，明年4月中到期，溢價7.5%，槓桿率10.7倍（有效6.4倍），引伸波幅33.2%。
九倉C輪9061：九倉（004）最低26.60元，收27.40元，逆市跌0.15元。有領匯帶住，九倉好易上番去。
搵九倉C輪埋手，成個市得兩隻，其中9061較佳，明年3月尾夠鐘，輪價15.6仙，溢價7.9%，槓桿率17.6倍（有效8.8倍），引伸波幅27.1%。
章盛