無綫繼續用梁榮忠擔正新劇《非常外母戇姑爺》，在劇中飾演其外母的薛家燕昨日試造型期間，不停將忠仔擺上枱，指他在劇中是一名滾友，更認為這個角色相當適合忠仔演繹。
無綫在梁忠榮、朱慧敏偷情一事上，被外間批評為厚此薄彼，朱慧敏被飭令即時停工，而梁榮忠除了繼續可以做台慶司儀外，還在新劇《非常外母戇姑爺》擔正。
為婦女請命
昨日梁榮忠、薛家燕、元華、秦煌、鍾嘉欣和楊婉儀等在將軍澳電視城為新劇《非》劇試造型，家燕姐在介紹自己的角色之時，亦不忘教訓忠仔。在劇中飾演神仙的家燕姐指着忠仔說：「凡間有個滾友滾我個女，呢個角色好啱佢做，做完呢套劇一定會翻身，咁你乖乖哋。」講完之後，家燕姐不停狂笑，忠仔見她語帶雙關地講個不停，忍不住說：「唔好咁激動，呢排都好敏感。」
家燕姐直認教訓忠仔是為婦女請命，她說：「我同啲師奶有相同感覺，我唔係講笑，係教訓佢。」家燕姐表示劇中角色最適合忠仔，她說：「觀眾睇完會會心微笑，忠仔一定做得好，劇入面佢係想滾我個女鍾嘉欣，就係因為貪圖美色。我係一個神仙，所以落凡間想盡辦法教訓佢，之後，佢都變番好，所以呢套劇就好似一個翻身訓練班。」
有報道指忠仔會被無綫雪藏，他說：「唔識答，呢個問題同好多問題都好難答，今年有百分之九十嘅問題我都唔識答，我要再修煉吓。目前係要做好面前工作，我八年冇喺無綫拍劇，心情都幾緊張。」
嚇怕鍾嘉欣
有報道更指正忠仔在《非》劇中的戲份會被刪減，由他主唱的主題曲亦要換人，但監製黃偉聲昨日表示沒有收到公司通知此事。
日前鍾嘉欣表示不怕坐忠仔順風車，忠仔說：「到時先算啦。」不過，昨日經家燕姐勸喻後，鍾嘉欣即改口說：「我會聽媽咪話，媽咪叫我唔好立亂上車，所以我會睇人先上車。」
採訪、攝影：楊潔雯
