李嘉欣噚日喺又一城出席亮燈儀式，佢着咗條VivienneTam嘅黑色低胸長裙，戴住條白金頸鏈，由聖誕老人陪伴下坐聖誕車出場，約五百名市民圍觀，場面哄動。
雖然嘉欣出場時，現場一度混亂，不過見慣大場面嘅嘉欣從容不迫咁坐喺車上，避開擠迫嘅人群，佢話：「我都驚多人㗎，但做嘢冇辦法啦，我試過出席活動時畀人踩爆咗隻腳趾甲，重差啲冧台，不過最後都搵唔到個真兇。」
寧收聖誕樹
嘉欣透露近日已開始收到朋友送嘅聖誕禮物，問佢有冇收到追求者送嘅禮物，嘉欣話：「唔知喎，收禮物唔會問人係咪追你喎，聖誕節我會去上海出席一個時裝活動，之後會同屋企人過白色聖誕。」
問嘉欣擇偶條件，佢話要有感覺同驚喜，佢講笑話：「對方可能送我十卡鑽石，不過送十呎聖誕樹重好。」問佢有冇收過十卡鑽石，嘉欣話：「最弊自己都買到，但十呎聖誕樹都唔係好難買啫。」
