恒豐金講咗好耐嘅「農村」分店終於開幕！主席林世榮噚日特登請傳媒參觀佢哋位於荃灣嘅分店，林生話，呢間分店嘅投資額約3000萬元，係佢偉大嘅「農村包圍城市」戰略嘅第一步。佢估計，喺未來3年公司會喺「農村」開多十多間分店。都咪話唔架勢。
林生又指金價上升無影響到佢哋嘅銷路，因為啲客都只係轉咗買珠寶！反而擔心世貿會影響旗下分店生意。佢話，公司喺灣仔嘅分店在世貿期間加強保安，亦會考慮放少啲金飾喺櫥窗度。佢估計嗰排啲生意一定會差啲，因為無酒店招呼啲旅客。
講開金價，林生又講番佢個金廁所，佢話連其他用黃金做嘅景點，若果一次過將所有景點熔咗再沽出，而家起碼可以賺成億七！佢原本都有啲心動，但諗深一層，若果真係熔晒啲景點，咁佢個場嘅吸引力咪大大減少？