德勤稅務合夥人關劍峯噚日出嚟見傳媒，主要喺介紹本港最新嘅稅務政策環境。佢話近年稅務局啲官員喺評估企業課稅時嚴謹咗好多，乜都按原則執正嚟做，因為公眾同傳媒對政府嘅監察提高。咁又係嘅，𠵱家政府做乜嘢吓吓都畀啲人質疑官商勾結，做官嘅惟有小心保護自己，唔係容乜易變成梁展文嘅翻版。
據佢所知，有間大藍籌公司就因為咁，被稅局追收9億元稅款；但亦有啲喺國內設廠嘅香港公司，怕咗稅局太煩，索性將間公司搬返大陸或者去澳門，淨係留番物流、銀行嘅功能喺香港做，咁就真係有得亦有失。佢又話𠵱家中國同香港稅局傾緊資料互換機制，相信喺07年初會達成協議，擔心屆時港商要多交稅款，咁就頭痛。