家吓大人要識理財，兒童理財亦係一個重要課題，香港會計師公會同智樂遊樂協會呢個禮拜日下晝1點到6點，就搞咗個「開心寶富遊戲街」活動，到時遮打道行人專區會變咗遊戲專區，有好多遊戲畀班細路仔玩（圖：去年情況），每個小朋友將會有一本「好玩存摺」，透過遊戲「打工」就可以賺到「錢磚」，玩之餘順便學吓理財。華華知道，會計師公會今年好積極咁搞兒童理財教育，佢哋成個計劃叫做「窮小子，富小子」，會派人去學校宣傳健康理財概念，拍埋短片，又搵咗過百會計師嚟做義工，出錢又出力，好認真㗎。
佢哋噚日重出咗本書講兒童理財㖭，搵咗專寫兒童故事書既NuryVittachigi嚟寫，圖文並茂，主要係畀小學生睇嘅。NuryVittachigi未必好多人識，但一講佢個筆名SamJam，相信唔少媽咪會有印象；本書賣50蚊，各大書局都有得賣，亦可以喺遊戲街度買。今個禮拜日，如果未諗親子活動，食完lunch，不妨去中環行吓。