在《金枝慾孽》飾演玉瑩小主的黎姿,上周與陳豪、佘詩曼及林保怡等一班《金》劇演員到馬來西亞雲頂登台,碰巧當地正播放該劇,所以一行人均大受當地市民歡迎。十年沒到大馬的黎姿還遇到一位癡心fans送信示愛,指每晚發夢夢到她之餘,還希望與她有進一步發展。
黎姿上周與陳豪、佘詩曼、林保怡及陳霽平等一眾《金枝慾孽》演員到馬來西亞雲頂登台,到達大馬當天,正值播放《金》劇結局篇,故各人在當地人氣鼎沸,甫到達大馬已馬不停蹄到電台及電視台做宣傳,晚上再到雲頂登台唱歌。
保留情信作珍藏
黎姿十年沒到大馬,今次再次到訪,竟收到一個追隨她十年的男影迷所寫的情信,她說:「個男仔除咗畀咗封情信我之外,每日就喺酒店樓下等我,我走嗰陣佢又去機場送機,真係好癡心。」
問黎姿情信的內容,她說:「講真,我覺得佢嘅文筆真係唔錯,用晒詩詞歌賦咁,但內容就好肉麻,佢話我係天上嘅月亮,又話我嘅笑容好似陽光咁燦爛,如果我係茶杯,佢就係杯墊,重要寫埋lloveyou,又話晚晚發夢都會見到我,更大膽到問我可唔可以同佢有進一步發展,想我做佢女朋友,講真我睇完封信真係好感動,因為有一個影迷咁長情,鍾意咗我超過十年。」
黎姿還表示過往拍拖及被人追求時也收過情信,她說:「女仔當然會鍾意收情信,真係好冧,我keep起晒所有情信,不過我就冇寫過情信畀任何人。」
幸紅疹冇生喺面
此外,陳霽平日前一抵大馬即身體不適,耳仔及頸部出現紅疹,竟有二百粒,塗止痕膏也無補於事,陳霽平說:「我返香港之後即刻睇醫生,打咗支抗敏針,好彩啲粒粒冇生喺面度。」