呢個時勢，咩生意都難做，但侷住要做就更淒涼！好似王維基檔城電，唔係搞收費電視都唔使見紅！咁點解重要搞？老王坦言情況就好似2G班網絡商咁，有邊個真係想玩埋3G㗎？喺呢個玩「賓杜」嘅大環境下，乜都話要綁埋一堆賣，佢已經無流動電話，如果唔搞收費電視，只喺賣齋+齋，點夠人哋啲雙拼鬥？
老王又話𠵱家騎虎難下無路可退，收咗十幾萬客，點都冇可能摺埋離場，佢重叫華華睇下內地播緊嗰套抗日戰爭劇《亮劍》，就知佢點諗。其中第2集講到八路軍俾日本仔圍攻，上頭叫退，但個團長李雲龍就丟咗部電話機兼再推前500哩，結果第2炮就打中日本仔個司令部……呢套劇喺內地軍人圈引起好大迴響，被評價為近年難得一見培養戰鬥精神的好教材。華華諗，老王成日話以搶電盈啲客為目標，唔知要幾多炮先打得死小小超？而讀番書的小小超又會唔會去睇下《亮劍》呢？