林家棟、田蕊妮、名模陳嘉容、童星原島大地同埋專誠嚟香港嘅「小長今」趙廷恩，噚日喺西貢出席電影《超級班寶寶》開鏡拜神儀式。小長今呢位韓國童星對開鏡拜神儀式相當好奇，企埋一邊好乖，相反原島大地就百厭得多，佢喺影大合照時重整蠱林家棟，搣佢屁股。
田蕊妮怕怕
家棟之後話有辦法對付原島大地呢個頑皮仔，佢話：「就係同佢玩，玩到佢攰，到埋位時就會好乖。」
雖然家棟口口聲聲話要對付原島大地，但佢就好細心咁分雞髀畀原島大地同小長今，成個慈父咁樣，而兩個小朋友就食得津津有味。不過，原島大地喺片場過份活躍，令本來有心做媽咪嘅田蕊妮即時有咗戒心，佢話：「都係諗吓先。」
而陳嘉容日前被傳已經同髮型師男朋友郭子輝結婚，但最近又火速分居。當問到老公會唔會嚟探班嗰陣，佢好尷尬咁話對方有工作在身，不過記者邊會放過佢，繼續追問落去，陳嘉容就好尷尬咁話：「不如問番套戲啲嘢啦。」
