馮德倫睇戲偷師
「我做咗導演後,比較鍾意揀啲較有製作嘅電影嚟睇,我覺得聖誕咁多電影入面要睇電影製作,《KingKong》肯定係我嘅首選,彼德積遜呢位導演我真係好鍾意,之前佢拍嘅《魔戒》已經令我歎為觀止,睇佢啲戲一定可以學到嘢,所以佢重拍《金剛》呢部片,我點會錯過。」
王晶撐港代表
「陳可辛係我欣賞嘅導演,佢嘅《如果.愛》又代表香港角逐奧斯卡最佳外語片入圍資格,我覺得呢部戲應該有睇頭。西片方面,我對《KingKong》都幾有興趣,因為呢一部戲啲特技好勁,我諗呢部戲票房重會高過《如果.愛》少少。」
馬偉豪貪新鮮感
「香港拍咗咁多年戲,本土可以話極少製作歌舞片,《如果.愛》用一個咁新鮮手法嚟拍攝,拍得極有中國色彩,又充滿浪漫氣氛,所以我好有興趣先睹為快。另一部由陳凱歌導演嘅《無極》我都有與趣,話晒都係中國版《魔戒》,我都想睇吓究竟部戲拍成點。」
陳果欣賞勇氣
「我覺得今年聖誕嘅電影幾吸引,所以我會盡量抽時間去睇,如果要我首選一部,我會揀《如果.愛》,因為我自己未拍過呢類戲種,我幾有興趣睇吓究竟陳可辛點樣處理一部中國色彩嘅歌舞片,呢類戲真係唔易拍,成本又高,又唔係咁商業,個導演真係要好大勇氣。」
張同祖全部睇晒
「我好熱愛電影,每年我都會睇好多戲,今年聖誕有咁多好戲排出嚟,我一定係會全部睇晒。以呢幾部聖誕片水準嚟講,如果觀眾有時間,經濟又負擔得到,我覺得呢幾部戲都值得入場睇,因為有幾部都係大製作,近年嚟已經好少同期會有咁多猛片一齊上畫。」