百盛百貨噚日掛牌，雖然近幾日個市唔係好就，但係埋單隨隨便便都升咗逾20%，算係唔錯啦！為隆重其事，百盛控股公司金獅集團董事長鍾廷森，同埋佢夫人，亦即剛宣布復出嘅陳秋霞亦有出席。華華問鍾太佢點解嚟呀？佢就話老公嚟佢咪嚟囉！用行動支持老公，真係好鬼恩愛啫！
除咗呢對恩愛夫妻外，現場重有一對近年較少曝光嘅夫婦，就係證監會非執行董事方正，佢都帶埋太座、前行政會議成員方黃吉雯出席。聽講話，陳秋霞同方黃吉雯私下非常老友，老友成點？半夜三更都會用電腦通訊嗰隻囉！唔知佢哋會唔會因為咁樣而冷落咗鍾生同埋方生呢？而方正出任百盛獨立非執行董事，又唔知係咪太座穿針引線呢？
講番百盛，佢個上市編號喺「3368」，係透過捐100萬畀公益金而投得嘅，貪其發音與「生生祿發」相近？好意頭嘛。
李華華