陳鍵鋒近期頻頻在中港兩地接拍廣告，實行密食當三番。談到在無綫新劇中跟汪明荃（阿姐）合作，陳鍵鋒形容阿姐是個爛玩死口靚妹，還幫她改了花名叫「沙沙」。
陳鍵鋒最近為旅行運動服品牌拍攝廣告，與小師妹吳亭欣（LuLu）合演小情侶，他日前說：「我之前都幫過呢間運動服裝行catwalk，LuLu都有份行，間公司就睇中佢。今次酬勞都好滿意，其實多少唔係好大問題，最緊要係有得做，我唔怕頂爛市，正所謂密食當三番，至緊要有人肯用你，做得開心自然有得做，錢唔係問題。」
起初驚到震
陳鍵鋒在下周三推出的無綫新劇《識法代言人》中，再飾演律師，還跟剛奪台慶最佳女主角獎的汪明荃合作，陳鍵鋒說：「我同其他人一樣，初頭知道同阿姐合作都好驚，因為佢好認真好嚴肅，但合作之後，原來佢根本係個爛玩死口靚妹，試過有次我同佢講話想改佢花名，我話叫佢做沙沙，點知佢好開心咁話幾好聽，之後我見到佢都叫沙沙。」
阿姐似媽咪
陳鍵鋒覺得阿姐玩得外，還會是個慈母，他說：「有次我病到開唔到聲，阿姐就畀咗家英哥嘅開聲配方我，叫我屋企人煲畀我飲，後來佢知道我一個人住，就叫工人煲畀我，搞到我好感動，佢當我哋後輩好似仔女咁。」
採訪：楊潔雯
攝影：陳偉權
