恒指跌91點,期指挫165點,雙雙低過萬五點。不過,上升股隻多過下跌股隻1成,個市唔使悲觀。長實(001)與和黃(013)分別跌1.75元與1.45元,總共拖低恒指33點。跌多些少,買長實與和黃C輪博反彈。
地鐵C輪9073:地產股有升有跌,升嘅有新世界(017)同信置(083)。跌嘅有長實、新地(016)與恒地(012)。地鐵(066)唔係地產股,但有地產質地,跌埋一份,收15.55元,唔見0.20元。
吼位買地鐵C輪,正路之選係9073,明年6月尾夠鐘,輪價66仙,溢價7.1%,槓桿率23.6倍(有效10.6倍),引伸波幅18.3%。
地鐵C輪共有12隻,9073最熱門,其次係4994。論數據,4994靚過9073,只不過交投靜得多。4994輪價0.95元,明年3月底到期,溢價2.6%,槓桿率16.4倍(有效10.1倍),引伸波幅20.6%。
恒地C輪9852:恒地跌0.55元,收34.30元,拖低晒啲C輪。散得最厲害嘅係9125,呢隻仙輪散46%。隻輪明年1月下旬到期,溢價19.4%,睇嚟好難有得剩。
恒地C輪隻隻溢價都好高,係都要博,只有9852勉強可以考慮,明年8月到期,溢價冇縮得咁快。
章盛