官恩娜昨日演出皮草騷，由於皮草是用動物的皮毛製成，被人批評做法殘忍。官恩娜卻為皮草商急急解話，並大唱反調表示皮草商在取用動物皮毛前有悉心照顧那些動物，做法已經很人道，官恩娜認真是語出驚人。
官恩娜（Ella）、楊崢和Rosemary昨日在灣仔為新款皮草行騷，現場所有皮草都是由動物皮毛製成，Ella示範狐狸毛頸巾時被取笑為狐狸精後，她急忙強調是貂毛，還笑言自己寧做神鵰也不做狐狸精。
問Ella會否覺得真皮草用動物皮毛製成很殘忍和不人道，她說：「𠵱家皮草商已經好人道，佢哋會悉心照顧啲小動物，就好似啲人養牛、養豬之後用嚟食，反而我覺得嗰啲保護動物嘅組織又話要放炸彈，咁咪重危害到人身安全。如果係用人道方法同唔使痛苦嘅過程去製造皮草，我自己接受到。」
急忙補鑊
現時保護動物的組織不時會有抗議皮草商的行動，難道Ella不怕受到那些組織的杯葛？會否覺得自己講錯說話？Ella急急補鑊說：「唔會，係人都知道我好鍾意小動物，除咗蛇同蜥蜴冇養過，我都養過好多動物，我會攬住隻金倉鼠一齊瞓㖭！」
對於Ella的驚人言論，記者昨日致電愛護動物協會發言人顏小姐，她在電話回應說：「Ella係一個細路女，去年佢都有同我哋合作過，可能佢以為製造皮草個過程好人道，但係佢都唔知道究竟係唔係真係咁人道呢。我哋唔會杯葛佢，亦都反對一啲激烈行為，反而我哋會搵機會同佢傾吓，等佢知道事情嘅另一面，我哋唔係愛斯基摩人，唔需要着皮草，如果啲人冇信心，先會用皮草裝飾自己啫。」
採訪、攝影：CamelLok
