文化電影界有啲人唔明點解政府搵「8號仔着數」做電影發展委員會主席，8號仔下面嗰個「𠵱家多金」其實同電影關係都好密切，咁鬼多個電影台，「着數」做地下火車嘅經驗，其實對香港電影工業都好有用。一直以來香港電影電視喺阿「跑跑沙」獨大之後，走嘅唔係荷李活嘅多元化企業路線，而係有啲邪邪哋嗰隻，香港娛樂圈啲話事人所以大部份都唔係讀書人，常走偏鋒，正當人家都好難玩，搞成咁完全係政府嘅錯，電視牌電台牌發嚟發去都係嗰啲人，無真正嘅競爭，「官方講台」又唔爭氣，所以搞到香港啲電視同電台節目幾十年都無變過，嚟嚟去都係得阿劉華，歌神呀，萬玉呀，啲新人個樣同內在美都係得啖笑。
冇法例保障拍電影
無他嘅，𠵱家啲娛樂電影投資老細，無幾個係讀書人，都係當電影係茶餐廳、舞廳咁搞，十幾年前其實有國際電影公司想喺香港投資電影，但係香港本身根本冇保障電影拍攝同埋電影行業嘅法例，咪只有啲撈偏可以封街拍戲囉，嘻嘻，香港啲娛樂圈表面好似好講雷氣，大大聲講嘢，但係講到做實在嘢，散到無影嗰隻。無計啦香港政府裏面真係識電影嘅兩三個都唔知有無，阿林玩光同肥龍可能係比較識電影，但係電影政策又係第二啲嘢，好專門，唔係嗰啲AO可以處理到，重要識處理嗰班電影界大帝同社團大佬，難度都好高，𠵱家胡蘇曾要搞電影搵「着數」做阿頭，好處係「着數」做事有啲紋路，唔會好似有啲電影大帝大哥，講就天下無敵，做就有心無力，大家都等阿「着數」做番場好戲，振興香港電影。
文化怪士
傳真︰2623-9278
電郵︰[email protected]