八方噚日收到料，話位於灣仔莊士敦道嘅表哥茶餐廳老店做埋噚日就收檔，於是急急問吓餐廳管理人張堅庭發生乜事。
張堅庭話，一切都係拜世貿第六次部長級會議所賜，當然業主加租係另一個原因。阿庭話，一般嚟講，十二月係飲食業旺季，聖誕新年大家都周街行、食吓嘢，但係政府搞單WTO，人人都驚晒，警察已經提醒啲地舖要加板保護，真係幾可怕。張堅庭話睇電視見到啲聲稱要嚟香港示威嘅韓國農民，覺得佢哋唔嘢少，容乜易搵啲米酒點着火掉過嚟，到時好大件事。左度右度之後，佢老哥都係決定停業，畀番間好有歷史價值嘅舖頭業主。唔講唔知，表哥呢個舖位以前南海十三郎成日喺度出入，邊個係十三郎？咪粵劇界嘅莎士比亞囉。
世貿會議咁擾民，唔怪有高人話，個會應該喺大嶼山舉行，而唔係灣仔。
傳真︰2623-9278
電郵︰[email protected]