彭敬慈是梅艷芳生前所收的最後一個入室愛徒，可惜舞蹈員出身的他一直星運浮沉，更備嘗零收入滋味，直至早前在林憶蓮演唱會中以倒掛金人造型表演優美舞蹈，才為人所注意，但他心中仍然有憾，輕歎說：「可惜我未有啲乜嘢成績，梅姐已經唔喺度。」
身為梅艷芳愛徒的彭敬慈，出道以來曾經拍過電影也唱過歌，但一直星途欠佳，直至早前他為林憶蓮的紅館個唱擔任伴舞，以金人look倒吊出場，其fit到漏的高大身形配合充滿藝術感的演繹，效果一鳴驚人，終令觀眾對他留下深刻印象。
唱歌即怯場
日前彭敬慈在九龍城接受本報訪問時，回想起化這個金人裝的過程即笑說：「我都冇諗過嗰part會咁好反應，有好多人都話好睇，其實都有好多嘢配合，個閃妝再加埋倒吊啦，跳就得嗰六分鐘度，但化妝要個幾鐘，跳完後落妝沖涼又個幾鐘，但都覺得好好玩。」
今次彭敬慈的演出雖為人所注目，奈何他心中仍然有遺憾，他歎道：「可惜我未有啲乜嘢成績，梅姐已經唔喺度，有啲遺憾，梅姐喺度時，阿詩（何韻詩）都已經ＯＫ，唯一係我未有成績，其實都係自己嘅問題，子彈唔夠，未夠料，跳舞就得呀，但一上台唱歌就怯場，未適應到。」他又表示至今仍銘記師傅生前經常掛在口邊的一句話：珍惜眼前人，故將來無論發展如何，他都會珍惜家人與身邊朋友。
事業失方向
彭敬慈不諱言有一段日子完全沒有收入，他說：「最淒慘係有段時間冇咗方向，我係咪應該繼續做呢？唔做呢行又做乜嘢呢？冇收入都試過，但我同屋企人住，以前跳舞都留咗啲錢，冇乜負擔，都夠使，唔使同屋企人攞錢。」
採訪：朱倬誼
攝影：葉君海
場地提供：ARJDanceCulture
