煲呔噚晚學咗美國總統，喺市民食飯時間發表五分鐘「重要聲明」，呢條橋唔知邊個教佢，其實好多香港人呢個時間重未落班返到屋企，所以未必聽到，亦未必受落。
當然，在此危急關頭，任何可以影響啲人星期日唔去遊行嘅方法，煲呔都會做。其實講多冇謂，事關舊年人大常委嘅決定肯定違反咗《基本法》循序漸進嘅規定，因為按草委所定嘅時間表，第一屆立法會有二十席直選，第二屆變成二十四席，第三屆增加至三十席；而功能組別則不變為三十席，選委會經三屆就自動消失，由直選取代。
所以如果中央按原來起草《基本法》嘅精神，二○○八年第四屆應該繼續加直選，同時減功能；如是者一加一減，經過第四、第五同第六屆就應該冇晒功能組別，自動達到普選目標，呢個就係時間表，冇花冇假。但係中央忽然轉軚，不單止唔減功能，重增加，咁都得，除非又話係善意謊言啦。
原地踏步免嘥公帑
好啦，𠵱家到香港立法會有權話事，我哋梗係唔制啦，冇時間表就寧願唔要，原地踏步有乜唔好？費事浪費更多公帑，養多十位尊貴議員，聽佢哋廢噏。
呢一次爭取民主普選運動，45條關注組都企得好硬，湯大狀重喺網站發放多款電子卡同wallpaper供大家下載，其中一款電子卡八方覺得好有意思，就係踢爆班友仔由毛澤東開始，到周恩來同鄧小平，以至煲呔都係得個講字。老毛話因為老百姓冇知識而不行民主政治係唔啱嘅，周總理亦覺得大陸民主作風不夠，而老鄧則更偉大，話最可怕係鴉雀無聲，相形之下，煲呔所謂支持普選濕濕碎啦。
所以要香港人信佢哋，中央要做多啲嘢。八方聽聞胡溫真係好想香港人滿意收貨，所以各路人馬已經嚟晒香港，收集港人意願，睇埋遊行先返去打報告提意見，邊個有萬全之計，胡溫多多有賞。
除咗湯大狀之外，阿牛亦唔執輸，佢由今晚起一連四晚，又喺空中開咪（好似話港九新界部份地區都收聽到），叫大家記得12.4上街，今晚佢同卿姐拍住上，聽晚才子蕭若元同黎則奮，後晚有華叔，大後晚有長毛，至遊行當日就全程廣播。阿牛今次又玩公民抗命，為民主，真好膽。
傳真︰2623-9278
電郵︰[email protected]