交通銀行喺畢打街嘅理財中心旗艦店噚日開幕，半年唔夠開到第4間，都咪話唔犀利，除咗3位副總經理陳霞芳、壽福鋼及須成發（圖左起）做主禮人之外，重搵咗兩隻金獅嚟助興，吸引咗唔少路過嘅外籍遊客，拎住部相機係咁影，人多到連對面馬路都企滿人，好鬼熱鬧。
副總陳霞芳重做埋導遊，帶住華華同其他行家參觀新店，呢間新嘅理財中心，有成8間私人會客室，個人客戶存款及投資總值超過80萬元嘅，就可以享用呢度嘅服務，做零售客以外，重會服侍埋企業客，家吓已經累積到有八十幾億資產總值，希望出年年初做到過百億。
陳霞芳同華華講，跟之前3間理財中心一樣，新店都係交行嘅自置物業，呢間連地庫一共四層，係交行85年一手買入。唔講唔知，陳副總唔只理財叻，書法都有番咁上下功力，事關通達理財個Logo，都係由佢設計，大家行過都要望多兩眼啦！