香港會計師公會理事會正舉行改選，有十五個人爭七席，競爭頗激烈，會長周光暉下個月就落任，跑馬仔遊戲本來唔關佢事，近日佢電郵會員臨別贈言，估唔到引起一啲風波。
事緣今個星期日，即係爭取普選遊行當日，公會喺中環搞「開心寶富遊戲街」活動，周光暉同會員講，「可惜」（Unfortunately）會計界立法會議員譚香文當日要遊行，但佢會盡力游說議員現身。有會計師認為會長此言可圈可點，有暗寸民主派議員之意。
周光暉則話，人人都有自由參加遊行，既然佢退位在即，就唔介意幽默咁開個玩笑，佢又話去年底已表明心迹唔再參選立法會，唔理得咁多江湖是非嘞。
有人辭官歸故里，自然有人趕科場，會計界老友話今次改選，陳茂波狀態最fit，公會今年創先河採用網上投票，可能令投票率大增，變數幾大，專業數佬都睇唔通。
傳真︰2623-9278
電郵︰[email protected]