老翻跑車破格出關

同樣係純悍跑車的日產350Z，有款老翻英國雅士頓‧馬田版本，其獨特的外形，令人錯覺以為真係英式跑車的新出品；雖然這部老翻車的性能跟真身AstonMartin相差有一大截，但就勝在擁有日本跑車那種狂野。

記者、攝影：陳偉林　
ImageGirl：Eppie

坦白講，第一眼望見這輛日產FairladyDB00Z時候，倒真給它酷似英國雅士頓‧馬田的賣相所吸引，想唔到部車一身改裝包圍，跟日產FairladyZ原車配合之下，可以做出咁神似的賣相。車頭一體式大泵把，配襯上AstonMartin獨特的超大型鬼面罩，重有該廠標記的霧燈組合、頭沙板兩旁透氣柵格、尾泵把整流，以及雙出式尾喉，單係改裝的外形，經已教人拍案叫絕。

■渾然一體的泵把連氣霸，時尚更具活力。

■頭沙板兩旁加有透氣柵格，既突出又吸引。

跑車避震帶出平穩

FairladyDB00Z用一台3.5公升V6引擎，輸出比正版的DB7低了少許，但那種日式狂野，倒十分適合香港的跑車迷，加上新車改換上四輪19吋跑車合金胎軨，及強化改裝的Sporty懸掛避震，由觀塘至清水灣試跑一段，發覺部車平穩順暢，而尾喉的咆哮聲，確教人心動不已。

■原車用上一台3.5公升V6引擎，四輪19吋合金胎軨及Sporty懸掛。

■尾泵把加有整流器，又有雙出式尾喉。

跑車空間聽歌好傳神

打開車門，一個充實的FairladyDB00Z跑車座艙，四周加有碳纖維面板修飾，時尚又前衞，身處其中，最欣賞是給人包得舒適的跑車桶椅，承托力十足。由於車本身屬本土版關係，中控台頂置有多功能行車電腦及AV屏幕系統，又有原廠恒溫冷氣裝置，在隔音出色的車廂中聆聽悠揚樂曲，確實係一件賞心悅目的事情。

■座艙陳設簡潔，富朝氣又見跑車辣味。

■三幅式軚環配襯突出，難得重有不俗軚感同轉向反應。

■車身兩旁加有裙腳，看來部車更靠貼地面。

日產FairladyDB00Z規格

引擎：3498ccV6DOHC
馬力：280ps/6200rpm
扭力：37.0kgm/4800rpm
傳動：5前速半自動波，後輪驅動
懸掛：（前）多連桿（後）多連桿
制動：（前）透氣碟（後）碟式（ABS）
輪胎：245/35ZR19FalkenAzenis
尺碼：4310×1815×1315mm
軸距：2650mm；
車重：1440kg
平均耗油：9.7km/L（日本10.15模式）
新車售價：$313,050
車輛提供：富利堡汽車（28772700）

■車尾空間寬敞實用，可擺放多件物品及行李。