劉日曦已有十年攀石經驗，由於他近日推出首張唱片，令他承受了不少壓力，是以日前劉日曦便抽空到旺角一間攀石訓練中心攀石，希望藉此暫時拋開出碟的壓力。
樂壇新人劉日曦（Alex）於美國留學時經常會與大班同學到郊外露營、行山兼攀石，他攀過最高的一個懸崖比香港的中銀大廈還要高，Alex說：「我大大話話玩攀石都有十年咁耐，我初時都係諗住跟班朋友仔去玩吓，點知玩玩吓就玩上癮，因為我覺得呢個活動可以訓練到自己嘅思路要好清晰。」
有驚無險
在多次的攀石活動中，Alex傷得最重的一次就是從二十呎高的懸崖掉下石堆中，幸好有驚無險，只是擦損了手踭，Alex說：「我嗰次都可以話係執番身彩呀，我都諗點都會斷骨啦，點知只係擦傷手。」
另外，Alex表示自從返港發展其歌唱事業之後，已甚少攀石，他說：「因為攀石呢個活動除咗一個人玩之外，另一個玩法就係兩個人一組，不過我暫時未搵到合適嘅partner，而且唔係人人都就到我嘅時間，最重要係公司叫我唔好玩到損手爛腳，所以我呢排都幾技癢㗎。」
採訪：李珮洳
攝影：何榮亮
場地提供：香港攀山訓練中心
