古天樂重溫童夢
「我嘅首選肯定係《KingKong》，呢部戲細細個嘅時候已經睇過，當時印象好深刻，𠵱家重話加埋恐龍一齊打，我真係好期待。今次重由《魔戒》導演彼德積遜執導，你話點會唔吸引，部戲用咗十幾億嚟拍，畀五、六十蚊入場就睇到，真係超值。」
周麗淇支持港片
「我好鍾意跳舞，所以首選肯定係《如果．愛》，我好欣賞陳可辛導演之外，呢部戲幾位主角我都好鍾意，加上香港係好少拍歌舞片，印象中只有荷李活先會拍呢類電影，難得香港可以拍到一部製作咁認真嘅歌舞片，我覺得應該支持。」
梁詠琪捧老友場
「今年聖誕有好多選擇，有幾部戲我都想睇，但如果真係要揀一部，我會揀《如果．愛》，因為呢部戲大卡士，好吸引我，學友拍歌舞片咁新鮮，當然期待去睇，加上金城武又係朋友，點都要去捧吓場。」
張家輝嘗人情味
「諗都唔使諗，我一定係先捧《KingKong》場。以前細個啲長輩帶我去睇呢部戲，大猩猩竟然會鍾意一個女人，我當時覺得呢部戲好有人情味。𠵱家大咗，對猩猩印象都重好好，我已經約定老婆（關詠荷）一齊去睇。」
楊千嬅愛歌舞片
「我對歌舞片情有獨鍾，所以會選擇《如果．愛》，不過西片《哈利波特》我都好有興趣，因為之前嗰三集我都有睇，小說亦有追，我知道第四集故事都幾吸引，所以如果時間許可，我都希望入場睇埋呢套戲。」
