噚日華華睇報紙，發現中電以主席米高嘉道理嘅名義，登咗一篇訃告，原來其集團前常務董事及行政總裁施以誠（圖）於11月25日喺倫敦不幸辭世，享年64歲，中電對此深感痛惜。華華都曾經訪問過於00年5月離任嘅施以誠，覺得佢係一個好有禮嘅人，待人接物都非常親切，絕無架子。
喺施以誠時代任職嘅前中電公關大員麥黃小珍同華華講，佢係喺感恩節晚餐後，收到呢個壞消息，雖然施以誠一向心臟都有啲問題，但以現今醫學嚟睇未免是早咗啲。佢重話施以誠喺00年離開香港，不過每年都會返嚟起碼兩次，探吓老朋友。佢話代表施以誠家人多謝大家關心。
講完啲唔開心嘢，講番啲開心嘢，中電推動環保不遺餘力，除咗喺電廠加設環保設備外，佢哋近日購置咗14架混合動力車，同埋計劃將旗下150架柴油客貨車，更換為較環保嘅汽油車。中電公共事務總監劉玉燕話，𠵱家佢日日都揸混合動力車返工，真係慳唔少油喎！