五礦資源（1208）噚日有開車迹象，股價踢高近7%至2元，成交達4115萬元。有消息話，五礦資源引入策略性投資者好事近，亦有傳聞話噚日急升只是追落後而已。
黑客話，隻股10月初以每股2.03元配售2.78億股（9800萬股新股及1.8億股舊股），之後股價下滑，於1.60-1.80元水平橫行。經過一段時間收集後，估計止蝕盤已沽得七七八八，都應該係時候開車。不過噚日所見，股價升至2元關口，股民似乎變得審慎，唔敢高追。
至於五礦計劃引入嘅策略性投資者，據聞來頭唔細，有相當實力。但唔知今次是五礦發新股，大股東會否再減持舊股畀投資者？上次公司配股，配售股數中有64.7%來自大股東減持的舊股，市場反應當然唔多好。
大手上板 新世界異動
新世界發展（017）噚日出現一宗每股10.15元，涉資3.6億元的大手成交上板，跟住股價一度急升近4%至10.55元，最後收報10.25元，升幅收窄至1%，成交則高達5.94億元。
i師傅話，現時唔清楚呢手大成交係邊個接咗。市場近期久唔久就傳出新世界好快會分拆百貨業務上市，但對新世界屬利好還是利淡，暫時好難講。如果在十一黃金周前進行分拆，當時市場仍對零售股有憧憬，應屬利好，但現時情況有變，零售市場增長放緩，加上租金上升壓力大，若在這些不利因素下強行分拆上市，可能會弄巧反拙。
息誘無效 莎莎遭拋售
噚日公布中期業績的化妝品零售股莎莎（178），每股賺5.1仙，但每股派息卻高達6仙，派突咗唔少，但仍遭拋售，股價挫3.44%，收2.80元。莎莎期內營業額增14.5%，但盈利卻倒退4.7%，可見成本上升不小，難免令投資者憂慮。據聞唔少大行正準備將其目標價及投資評級降低，可能重未跌完。
阿虎