前幾日「蘋果世界」有一段新聞，話倫敦自然歷史博物館放棄舉辦珠寶展覽，因為有匪徒聲言打劫，產生保安問題，主辦當局費事麻煩，故此腰斬算了。
飲茶時候，問珠寶公子Ｌ：「珠寶展怕偷嘢，怕打劫，索性唔辦，算唔算斬腳趾避沙蟲？」公子Ｌ大笑：「邊度會吖，應該係參展商數目不足，搵個藉口唔辦就差唔多。」左丁山問：「倫敦係首善之地，全世界富豪集中，點解珠寶商對倫敦展覽嘅反應唔夠熱烈？」
公子Ｌ話：「你有所不知矣。參展商主要係珠寶製造商，睇展覽之人係全世界嘅珠寶入口商、批發商，私人買家唔會去呢啲大型展覽買珠寶嘅，佢哋會去歷史悠久，聲譽卓著嘅珠寶店睇貴價貨。現在珠寶製造商大部份集中喺東南亞與中國，香港佔盡地利，現在一年四次，每季一次喺香港舉行珠寶展，最多一次起碼有千幾家珠寶製造商嚟參展，最少嗰次都會有幾百。喂，你計吓數嘞，珠寶製造商參展有成本，要準備好多功夫，嚟香港參展，成本比較便宜，交通方便，內地商人來港好容易，去歐洲喎，淨係攞簽證都煩到死。曾經係全世界最重要嘅珠寶鐘錶展，巴塞爾展覽，𠵱家已日漸失色，香港慢慢有資格取巴塞爾地位而代之。曼谷都有搞珠寶展，已經感受到香港嘅壓力。機場亞洲國際博覽館正式營業之後，香港好有資格成為展覽之都，只有拉斯維加斯可與香港一爭。」
公子梁唔講，左丁山唔知香港咁巴閉，諗落係拜大陸商人大量參展之賜，內地（如上海、廣州）雖然積極擴建展覽場所，但因為參展貨物清關、官僚效率、展覽管理各方面遠不如香港，內地商人情願來港參展。過往一向在上海舉行嘅ChinaSourcingFair，明年開始，捨棄上海，搬到機場嘅亞洲國際博覽館舉行，就證明上海暫時唔夠香港爭。