現時芬佬嘅焦點股，仍然係大陸消費股，呢類股份有啲好似神仙股，升完可以再升，而且當一般人覺得好貴時，仍然有芬佬拍心口話買得過。
例如飲食同埋送餐嘅福記食品（1175），去年12月以3.10元招股上市，至今未夠1年，但股價最高見過10.90元，昨日收10.25元，計落升幅有兩倍幾。不過，近期仍見到細摩喺10元樓上增持，另外又有證券行出報告推介，真係點到你唔服？
經紀黃話，有人認為福記呢門生意，喺大陸屬於高增長行業，而公司上市以來，由新股集資所得，以致早排發債集資嘅6億銀，統統用晒嚟做業務發展，勁搞中央廚房，所以發展速度驚人。
福記今年9月份每日產能高達45萬份餐，隨着新的中央加工中心落成，產能數量將愈來愈大。由於福記規模夠大，成本相對於其他新加入者為低，佔有一定優勢，所以芬佬預期福記盈利持續高速增長。
福記剛於上周公布截至今年9月底中期業績，盈利有1.14億元人民幣，升63.1%，中期息派7.5港仙。
慕容小初