近期標售嘅物業，反應唔算熱烈，美記噚日幫個投資者標售一籃子旺區舖連埋薄扶林貝沙灣豪宅，一支標都收唔到。
反而世邦魏理仕件筲箕灣東匯廣場，事先張揚話反應好，要提前截標，據悉，收到四支標，今個禮拜五會有結果。
美記呂炳坤話，呢排買家唔多鍾意玩入標呢咪嘢，事關個價，畀業主最少hold住一個禮拜，反而私下傾，靈活啲。
好似噚日截標嘅旺角花園街一五○號地下，以及尖沙嘴新文華中心地下六十二號舖，有四五個客私人協議傾緊。
不過，貝沙灣一期及三期兩伙，業主心目中要賣到每呎九千幾蚊，所以暫時冇人諗。
電郵地址：[email protected]