文壇鬼才倪匡噚日應樹仁學院新聞傳播學系系主任梁天偉嘅邀請，去樹仁學院同幾百名新聞系學生真情對話，倪匡手持枴杖到達禮堂，現場所有學生即時鼓掌歡迎。喺兩個小時嘅談論中，倪匡談笑風生，除提到當年自己嘅創作軼事同埋自己有好多外遇之外，都有講起個仔倪震同女友周慧敏。
周慧敏食防腐劑
有學生問到倪匡點睇上次倪震攞隻貓自拍裸照放上網，佢笑話倪震應該袒蕩蕩，攞開隻貓，既然擺得上網點解唔敢俾人睇，引嚟全場爆笑。
講到周慧敏，倪匡大讚話最好有個咁嘅老婆，但做唔到，所以𠵱家就希望有個咁嘅新抱，重話自己好恨飲新抱茶，但就唔明倪震用乜嘢法寶可以唔結婚，而個女仔又肯，佢話：「周慧敏唔知係咪食咗防腐劑，個樣一啲都唔老。」
喺傾談途中，倪匡手機多次響起，原來佢啲老友打嚟約佢食飯，倪匡話香港人情味濃咗，令佢好感動。講起近代作家，佢以前用空前絕後嚟形容老友金庸，不過𠵱家就會改為無出其右，至於諾貝爾文學獎得主高行健嘅作品，倪匡話攞咗佢兩本出名小說嚟睇，但睇到佢嘔白泡。
