最怕拎住本攻略打機，又唔想打打吓機要上網「搵路」的話，玩一啲「簡簡單單」嘅遊戲，可能更能領略遊戲樂趣，任天堂就係簡單遊戲嘅高手，其實另一遊戲大廠SEGA，亦有一個代表作《SuperMonkeyBall》系列，純考玩家反應，消磨時間就最一流，新作《SuperMonkeyBallDS》更走上NDS，加入Stylus操控，可帶來唔少新鮮感。
記者：許福合
前作曾喺GC大受歡迎，所以今次都有唔少玩家期待，今次馬騮仔仍然喺個波內滾來滾去，不過GC版以操縱「地板」傾斜令馬騮仔前進，去到NDS，雙芒兼玩TouchScreen，當然要充份利用，玩落感覺完全唔同，好似玩緊新Game一樣。
用Stylus篤住玩
論遊戲玩法，其實同前作大同小異，重點係轉用咗Stylus作為主要操作，兼且NDS具有雙芒優勢，又令玩家玩落好有新鮮感，首先，上芒仍然係負責主要畫面顯示，一般見到嘅都係3D遊戲畫面，而下芒就係當時嘅2D畫面，同時下芒亦會顯示好多遊戲相關資料。要令馬騮仔移動，主要係用Stylus筆喺下芒度畫，最基本常見嘅競賽類遊戲，就用筆畫住嚟玩，與以往按方向掣嚟傾斜地板，感覺操控更易上手，尤其簡單係控制力度方面，畫遠啲會大力啲，玩起來就比較易掌握，至少唔怕揸住部NDS，玩到「手舞足蹈」。
操控多元化
不過《SuperMonkeyBallDS》當然唔係就咁讓玩家畫吓畫吓就過到關咁簡單，競賽類遊戲只係其中一個玩法，主要係以最短時間內取得最多香蕉，有時路面好窄，用Stylus控制就頗有難度，每畫一下時，經常趕不及即時反應畫出第二次，就咁就Gameover！而唔同遊戲又會配合番唔同Stylus操控方式，真係可以數之不盡來形容，玩家開始遊戲前可留意說明。比較好玩嘅有打高爾夫球，下芒會顯示一個圓圈嘅力量表，玩家要用「畫」來決定打波力度，難度算係中等，係一個易學難精嘅遊戲。另外亦有保齡球，同樣於下芒畫一下，可決定球嘅方向同力度，不過要留意，並唔係一味向前推就好，因為場地可能有暗斜，發球前要考慮在內。
超過100個版圖
遊戲內最主要有3個模式，分為挑戰、練習同重播模式，玩家最常玩到嘅都係挑戰模式，當中可以選擇6個唔同角色，各自有唔同裝扮同外形，都幾過癮。DS版將會分為十大個版圖，而當中又會細分為10個細版圖，即係話總數可以多達100個版數，加埋還有隱藏版圖，真係非常襟玩！不過遊戲之初，大多數版圖都係雪藏之中，要先闖過晒初期版圖先會解封！覺得有一版非常難玩？唔驚，只要去到練習模式，就可以隨意選擇已開封版圖玩，慢慢研究如何破關，亦可讓完美主義玩家找出如何玩到最佳成績。至於重播就可睇番之前儲存紀錄遊戲畫面，最啱高手向朋友示威之用！另外，雖然遊戲未支援Wi-Fi對戰，但亦可透過無線網絡與朋友對賽，最多４人。
機迷試玩
Profile
遊戲廠商：SEGA
類型：動作
推出日期：12月1日
遊戲人數：1-4人
售價：$268
