昨日有人叫阿虎留意福山能源（639），話此股已經開車，要跟趁早。阿虎望一望個大利是機，原來股價已突破0.90元，都唔知追唔追好？結果全日收報0.93元，升10.7%，成交增至1140萬元。
福山能源今年3月低位0.265元，5月初炒上0.50元樓上，之後在0.45元水平橫行整固，上月底再起步炒上，以昨日收市價計，已升咗1倍，公司市值達19.4億元。
福山能源前身為福山控股（再之前係金輝珠寶），改名後顧名思義要進軍能源事業。福山能源現時主要持有山西曜鑫煤焦51%股權，呢間焦炭廠預計於今年第4季建成投產，無往績可言。
市場都知此股街貨疏，皆因公司於8月時公布，獲聯交所知會公司股權高度集中，20個股東於6月13日共持有31.61%股權，連同大股東王力平持59.59%，其他股東持股量只得8.8%。隻股街貨咁疏，若有人想舞高弄低應該唔係太難，問題係此股似乎已被監管當局緊盯，如果炒得過火，隨時會被叫停解釋，跟炒者要有心理準備。
紫金傳芬佬食胡
金價升破500美元關口，不過紫金（2899）不升反跌2.65%，收2.75元。據聞有芬佬覺得金價主要被對沖基金推高，且已升得過份，恐怕將有大調整，所以趁高沽紫金埋單計數。紫金由11月8日的2.175元升至周一的2.825元，累升30%，芬佬已足夠向客戶交代。
冠中大成交急跌
冠中地產（193）早前借染濠消息炒高，最近重玩埋拆細，股份1拆5，股價上周五升至4.075元，噚日卻大跌17.2%至3.25元。黑客話市傳有炒家散貨，暫時不宜撈底，噚日成交相當活躍，金額高達3282萬元。
阿虎