因被廉署調查而停牌達1年嘅創維數碼，早兩日邀請傳媒到深圳廠房參觀，介紹佢哋公司嘅最新發展，希望省番靚個招牌，今次主要介紹佢哋所研發嘅新功能彩電產品。首席執行官張學斌話，企業嘅發展就好似無終止嘅馬拉松賽一樣，不斷要求增長，所以佢哋採取多元化發展策略，謀求集團有更高速嘅發展，首要條件當然係最好快啲復牌啦。
之前，創維前主席黃宏生被指涉嫌造假帳及挪用公款而被廉署拘捕及落案起訴，但仍有公司員工懷念佢。有員工話，佢哋公司好慳家，好似黃宏生咁，當年坐飛機只會坐經濟客位，住酒店都只係住啲三星級，日租二、三百蚊就最啱佢。但對待員工，就會以獎勵激發其工作向上，例如做研發嘅工程師，如果佢哋嘅科研產品大受市場歡迎就可以獲獎，獲獎年薪最高試過達30至40萬元，一啲都唔慳。