日日好消息? - 左丁山

日日好消息? - 左丁山

領匯上市成功股價急升兩成。第三季嘅GDP增長率達到8.2%,全年GDP增長預計高達7%。呢兩項好消息都在上星期五發生及發布,跟住兩位航天員/宇航員/太空人費俊龍、聶海勝來港,上星期日在大球場出席大會,星期一到中文大學,星期二見商界青年與運動員,又係好消息。
八卦T認為,本星期將會有一連串好消息出籠,目的係營造全港繁榮穩定安樂氣氛,減低市民喺十二月四日上街嘅意欲。八卦T話:「兩位太空人返回地球後,第一次出遊,就以香港為第一站,時間唔遲唔早,編在十一月二十七日至二十九日,你話冇政治含義,我就唔信。」

政治含義一定有嘅,問題係政府重收埋邊啲好消息未宣布呀?領匯碰啱好時間,算係第一單,GDP增長率高,係第二單,太空人訪港,係第三單。之後呢?八卦T話:「嗱,大家估吓,第四單係巴士票價可加可減機制會有突破,長程票價優惠取消預繳,短程票價係咁意減一啲,咁重唔皆大歡喜?陳祖澤本來就係計仔多籮籮嘅人物,喺工商署時高級過曾特首,特首同佢講一句,識做啦;第五單可能係公屋減租,叫孫明揚做番一啲門面嘢;重有第六單㗎,可以叫唐司長放風話研究增加供樓人士嘅按揭供款利息扣稅上限,減輕利率不斷上升對供樓人士嘅壓力;呢三招齊出,普羅大眾、公屋居民、中產人士全部討好晒,重會唔會上街爭民主普選呀?」
八卦T講到似層層,其實係全部靠估,不過靠估之餘,呢幾招都好有實用價值,在政府能力範圍之內,如果真係由曾特首輪番宣布,咪話冇影響。不過,香港已經衣食足,知榮辱,唔會吃嗟來之食,爭取民主普選,係天經地義之事,話香港人普選條件未成熟,當我哋連阿富汗人不如,你話點會順氣。