會計師公會噚日公布「05年度最佳企業管治資料披露大獎」，會長周光暉話，結果反映本港整體企業管治水平有所提升，但創業板公司同公營非牟利機構嘅管治水平就有待改善。但華華睇完張得獎名單（附表）後，淨係覺得同舊年差唔多，得獎機構又係中電、滙豐、利豐等，好似TVB台慶分豬肉，咁係咪等於其他企業冇進步過呢？
創業板嘅情況就更明顯，今年照舊無白金同金獎，重要又係媒體伯樂冧莊攞鑽石獎，其他創業板公司管治水平如何，相信唔使多講。至於恒指成份股組別最佳進步獎，就由李超人檔和黃奪得，理由係佢哋喺推動企業管治水平方面有顯著進步。但華華覺得佢哋啲年報重係好難睇得明，咁會俾人以為有好多嘢隱藏咗，試問同台慶夜唧唔出眼淚的TVB飛躍演技進步大獎得主周麗淇有咩分別呢？