恒指跌71點，12月期指跌88點，高水42點。前日12月期指高水達58點，原來唔係意味昨日好市。昨日恒指由低位14958上返15028收市，彈番69點，有啲力度畀你睇。
新地（016）除息1.50元，拖低恒指11.4。
新地C輪9059：新地除息，實際跌0.60元。再跌啲，買C輪博反彈，有兩隻可作主打，1隻熱門，1隻半熱門。
熱門主角係9059，明年4月初夠鐘，輪價37.5仙，溢價5.4%，槓桿率19.9倍（有效10.4倍），引伸波幅22%。
半熱門主角係9791，明年5月初夠鐘，輪價42仙，溢價6.6%，槓桿率17.8倍（有效9.2倍），引伸波幅22.8%。
新地有幾隻C輪，槓桿率非常大，講緊幾十倍。揸住呢啲輪，撞啱正股忽然升兩三蚊，會贏到開巷，但正股牛皮，淨係縮溢價，就會輸到死死吓。
恒指C輪9727：吼低位買恒指C輪，博大市反彈。如果唔想太刺激，可向9727埋手。
9727明年4月尾夠鐘，輪價22.8仙，溢價4.1%，槓桿率14.3倍（有效9倍），引伸波幅20.8%。
恒指每變動100點，9727理論價上落6%。
章盛