八十三歲嘅諾貝爾物理學獎得主楊振寧再婚後如沐春風，兼任中文大學博文講座教授嘅佢近日頻頻拖住後生佢五十四年嘅年輕太太翁帆四圍去，繼早排俾娛樂版同事影到佢哋同劉詩昆一pair喺中環食飯後，八方上星期六喺又一城又見佢哋拍住拖逛唱片舖。
楊教授猛搵懷舊電影影碟，楊太明顯係王菲嘅fans，一味摷阿菲啲舊唱片。雖然兩個人口味唔同，但翁帆見到丈夫搵唔到想要嘅碟，即刻幫佢搵，畀錢買碟之後，兩人一出門口就十指緊扣，煙韌得佢哋吖。
八方見佢哋買咗三隻碟，楊太揀咗隻王菲唱片，楊振寧就睇啱一套五十年代、由海明威短篇小說改編嘅舊西片《TheSnowsofKilimanjaro》，套戲講淨係掛住寫作忽略咗女伴嘅作家，錯過一段美好愛情，但最後喺叔叔協助之下尋回自我。
翁帆畀錢時，重用廣東話問職員購物有冇泊車優惠。睇嚟楊太唔只識揀老公，重係一個精明消費者。
傳真︰2623-9278
電郵︰[email protected]