入戲院睇戲嘅人愈來愈少，香港電影業嘅景況𠵱家有幾淒涼，唔使講大家都知；好似噚日開股東大會嘅嘉禾娛樂，佢哋喺高峯期每年可以出產成500幾部片㗎，但今時唔同往日，舊年就只係得45部，創出歷史新低，錄得虧損當係意料中事。主席鄒文懷噚日同個女——嘉禾娛樂執行董事陳鄒重珩一齊出席記者會，被記者問到佢有乜計仔扭轉劣勢呀？佢都只係話：「盡力而為」囉！
不過，鄒主席隨即又斬釘截鐵咁話，無諗過發展其他業務，仍然會主力做電影發行，同埋搞院線。即係從一而終，絕不變心，睇嚟鄒主席都係一個專一嘅人。佢重話如果要融資，就會同銀行傾吓，暫時無諗過供股集資住喎。佢哋喺馬來西亞同台灣都係同人拍檔做生意，但國內市場就會自己做番，所謂肥水不流別人田嘛！好似喺深圳萬象城嘅嘉禾深圳影城，出年年尾就會進行擴展工程，加到12個廳（戲院）。
問鄒主席有冇收購大計？佢嘅回應都好有趣，話收購就好似行街咁，見到有抵買嘅嘢咪買囉，但事先唔會有乜實質嘅計劃，就算有都唔會事先張揚啦！
李華華