個市窄幅上落，恒指波幅得60點，埋單升18點。即月期指升66點，高水24點，12月期指更高水58點，估計繼續整固，大升唔易，大跌亦難。炒輪策略，鋪鋪清，咪長情。
中移動C輪9471：中移動（941）是日高低相差0.50元，埋單升0.25元，好少有咁細波幅。年底結算，芬佬舞住啲重磅股，中移動有機會向上移動，吼住有回吐時，低位執C輪，執得多少就賺錢離場，實行密食當兩番。
C輪主角對象係9471，明年3月中前夠鐘，輪價40.5仙，溢價4.4%，槓桿率9.4倍（有效6.6倍），引伸波幅31.2%。正股每變動0.50元，隻輪上落幅度係9%左右。想炒得更短，例如炒一兩個鐘頭，揀明年4月中到期嘅9695，呢隻上落更快。
思捷C輪3475：思捷（330）是日除息，實跌1元，C輪隻隻散。思捷由芬佬支指揮棒指上指落，唔會一面倒單向移動，低位買C輪3475，博反彈。
隻輪明年1月尾夠鐘，輪價54仙，溢價1.7%，槓桿率10.1倍（有效8.1倍），引伸波幅27.5%。想買賣易，向明年2月初到期嘅4718埋手。
章盛