前日華華個老死講過，超人檔「3香港」會換走黎明，搵兩個港、台人氣歌手拍新一輯廣告，昨日終於開估，男嘅係來自寶島的光良，而女嘅就叫衛蘭。佢兩位人氣有幾盛華華唔知，只係個個同事行過都問華華呢兩位係乜水？簡介吓啦，光良就係唱《童話》嗰位，呢首歌先一排係熱爆K歌，佢有無黎天王咁靚仔？見仁見智啦！
而衛蘭即係Janice，就係黎天王個師妹，佢出第一隻碟就勁翻唱師兄啲歌，收音機先個排係咁成日播㗎，聽講係少數唱Live唱得唔錯嘅新人之一。可能係班同事唔聽收音機同唔唱K囉！不過都係唔明，點解超人唔用黎明而要用佢師妹？以師妹嘅人氣嚟睇，除咗師兄推薦，真係無咩理由……唔通呢啲就係福地後人耕？