十二月四日星期日，究竟有幾多人上街遊行，大家靠估！二萬吖，三萬吖，五萬吖，還是會有十萬？馬會足智彩如果可以加開一個特別「球盤」，由一萬至十萬人都開出一個賠率，相信會吸引唔少注碼。乜唔係呀，平時在公開場合絕不講政治嘅大賓架，請食蛇之時都猛咁問眾人對第五號報告書嘅意見，是否可以通過等等，可見商界高層對此甚為關心。
資深愛國人士C對大賓架答得妙：「最好嘅係三贏局面。第五號報告書點會攞到立法會四十票呀！民主派用綑綁方式，嚴防有五個人轉軚，改投特首陣營，所以一定唔會通過嘅！好吖，原地踏步，中央高興，我哋左派高興，民主派反對成功，佢哋又高興，咁咪造成三贏局面囉，或者只有特首表面唔高興！」愛國C幾十年來愛國堅定不移，絕非突然愛國派一類嘅搖風擺柳人士，佢話本地左派唔高興第五號報告書，應可相信。
《蘋果日報》喺星期五報道話中央唔想咁快普選，係因為怕選出好多民主派，佢哋控制立法會就可能大派免費午餐，增加福利，損害本港競爭力。其實呢個理由係攞嚟講，十分牽強。你估民建聯、工聯會嘅議員唔識派免費午餐咩，如果佢哋控制立法會，中央又是否放心？例如陳婉嫻係最低工資立法急先鋒，王國興亦然，一位政府高官曾經私底下講，佢哋認為王國興喺勞工問題上，更加激進，政府怕咗王國興都未到怕李卓人、劉千石。怕嘅意思就係，王國興更加令商界頭痛兼且反彈！
不過諗深一層，中央對民建聯、工聯會有最後控制權，孫悟空不會翻出如來佛手掌。中文大學新亞書院喺前個星期五搵馬力與李永達一齊出席月會講政改，學生冷落李永達，集中火力問馬力，香港幾時先至會有普選，在乜嘢條件下先至有普選，聽講馬力竭力回答，最後都係話，由中央決定！