著名詩人北島嚟咗香港，噚日喺中大崇基學院出席一個詩歌朗誦會，謝昭杰室擠滿佢嘅詩友。
北島原名趙振開，當年係北京文學雜誌《今天》主編，佢今次嚟香港，主要推介新散文集《時間的玫瑰》。呢位以新詩出名嘅中國詩人以佢精煉嘅語言，敏銳嘅觸覺，講述九位佢心目中二十世紀最偉大嘅西方文學大師，包括洛爾加、里爾克同策蘭等等，實在值得一看。北島九七年嚟過香港，今次重來，佢太太甘琦亦由北京抱住不足一歲嘅小北島南下會夫，大家喺香港小聚，之後佢會返美，近年北島喺加州一間大學搞創作，明年會轉到美國中部聖母大學任教。
如果大家錯過咗噚日嘅活動，北島聽晚會喺尖沙嘴星光行商務同讀者清談，周四港大就有一個《今天》二十五年嘅研討會。
傳真︰2623-9278
電郵︰[email protected]