鍾鎮濤（阿B）家有兩犬，分別是西摩「AhBoo」及約瑟爹利「豆豆」。豆豆試過瀨尿後，蠱惑地逃離現場，阿B緝兇時誤以為是AhBoo所為，險殺錯良民。
鍾鎮濤家有一大一小可愛汪汪狗，大的是西摩犬AhBoo，小的是名為豆豆的約瑟爹利，兩隻狗都已三歲多，自從養了兩隻狗後，阿B覺得家裏熱鬧不少，最好的是他不用一個人做運動，行山跑步都有狗作伴。
阿B說：「我養AhBoo時咁啱幫《怪獸公司》配音，戲裏面有個細路女叫AhBoo，我覺得幾得意咪用呢個名囉。抱豆豆返嚟時細細粒，放佢喺隻杯入面，帶埋去湊個大女放學，佢鍾意到不得了，成粒豆咁，咪叫豆豆囉。不過我買豆豆嘅時候話係YorkshireTerrier（約瑟爹利），應該係黑色加啡色嘅，點知大大吓佢啲毛變成灰加啡色，成隻SilkyTerrier（絲毛㹴）咁款，可能俾人呃咗啦，不過算啦，養咗幾年有感情，佢就算五顏六色我都咁鍾意。」
行山跑步有伴
閒時阿B會行山跑步，AhBoo就是他最好的運動伴侶，兩隻狗都懂性聽話，相處時十分融洽。阿B說：「狗係需要主人花時間照顧同關心嘅，每次我返屋企，兩隻狗都嚟黐住我，一定要同佢哋打招呼、傾句偈先得，朋友嚟都要打個招呼先入得屋㗎。大嗰隻老實，細嗰隻蠱惑，有時豆豆喺客廳瀨咗尿，我大叫邊個做嘅，豆豆會即刻匿喺枱底，AhBoo就儍更更咁企喺罪證隔籬望住你，唔留心好易怪錯狗㗎。」阿B謂最有趣是每次他罵豆豆，牠都會扮眼瞓，將頭搖呀搖，眼睛半開合，然後不支倒地裝作睡着。
識為對方求情
兩隻狗相處起來亦情深義重，有時豆豆做錯事被打，AhBoo就會將手搭着阿B的手，示意他不要再打了，為豆豆求情。到AhBoo被打，豆豆會跑來不停黐阿B，阿B說：「俾佢黐多兩黐𠱁番，乜嘢氣都冇晒啦。連狗都識相親相愛，人同人間更加要和睦共處，屋企氣氛都融洽好多㗎。」
採訪：蔡如玉 攝影：仇志德
