工業股老大哥震雄集團（057）上周五公布中期業績雖然倒退，但就無損芬佬對佢嘅興趣，股價不跌反升。經紀黃話，由於分析員預期原材料價格回落，營商環境改善，所以焦點唔係睇之前嘅業績倒退，而係睇未來嘅盈利增長。
震雄上周五公布今年9月止中期業績，盈利1.47億元，下跌7.5%，但維持中期息5仙，昨日股價大升7.69％，收4.20元，成交139萬股，金額568萬元。
經紀黃話，呢兩年來投資者勁炒資源股，原材料如鋼鐵同塑膠價格升幅驚人，可知對工業股影響有幾大，家陣預期原料價格回順，工業股當然可以睇番轉頭，不過今年曾發生多單工業股爆煲事件，所以芬佬比較審慎，震雄本身歷史悠久，往績亦交得準，揸得會比較安心，只係成交量太細，買賣較困難。
另外，早排一度急跌的萬裕國際（894），在公布大股東增持後，昨日急升14.29％，收2元，成交股數1172萬股，金額2190萬元。經紀黃話，一早講咗公司本身無恙，急跌只是個別事件，但昨日升得咁急，唔排除有投機買盤搵食。
慕容小初