自從PEOPLES畀祖國的移動買起之後，大家一直估佢跟住會點，要改名？要裁員？昨日PEOPLES公布Q3業績，執行副主席梁啟雄一一開估——繼續用番原有人仔品牌、冇裁員，但最正係個加薪機制得到新老細大力支持！
2G有排玩
雄爺話，佢哋一路以來加薪係同生活指數掛鈎，花紅就睇業績表現，除咗年年有人工加，舊年就試過有同事分到10萬蚊花紅……下個月佢哋就會做薪酬檢討，唔使問照舊人人有份，雄爺咁為班手足謀褔祉，華華同班行家何止感動，直頭有轉工的衝動！
咁講番盤生意，雖則有移動照起，但無3G牌點同人鬥呢？雄爺話，𠵱家啲人用3G，其實因為零手機之類優惠，並唔係真正有市場需求，以佢身邊啲朋友為例，無一個真係為咗3G技術而出3G，所以佢相信2G仍然有排玩……唔知拎住3G牌做到嘔血嗰4間網絡商有乜感想呢？