賭王何鴻燊年年生日都要「車輪式」同多位姨太太慶祝，佢上個禮拜先同三姨太陳婉真喺珍寶海鮮舫擺壽酒，之後就同四姨太梁安琪喺信德賀壽。前晚賭王舊曆生日，輪到陪二姨太藍瓊纓，根據往年習慣，二姨太會親自下廚，煮賭王最鍾意食嘅魚同豆腐等菜餚。
陳子聰發惡
前晚七點左右，何超瓊、何超鳳及何超蕸陸續到達藍瓊纓所住嘅渣甸山谷柏道大宅。佢哋着住便裝到場，賭王幼子何猷龍同太太羅秀茵重帶埋一對西施狗仔嚟。而盛傳懷孕嘅何超儀，與夫婿陳子聰到場時，就引起小混亂。話說記者衝前拍攝，有攝記嘅相機撞到車窗玻璃，陳子聰即時發惡，隔住玻璃窗怒啤記者。賭王就八時左右到場，經連日奔波慶祝嘅佢，相信係體力透支過度，明顯露出疲態。
採訪：梁錦雯 攝影：陳慧安
