美股連升5周，港股亦連升4周，短期要先整固一下，喺下月世貿會議之後，再到年尾向更高位推進，為好友帶來唔錯嘅聖誕禮物。
近期有啲藍籌升得好急，超買咗啲，佢哋嘅C輪，要避一避，等回吐先至諗。
太AC輪9053：國際油價陰陰落，對航空股有利，太古（A,019）有航空股嘅質地，而近期股價亦落後大市，估計會行番快啲，值得搵啲C輪玩吓。
太AC輪兩隻手掌數晒，普遍冇乜成交，最大成交嗰隻係9053，明年2月底到期，輪價24.8仙，溢價6.4%，槓桿率28.5倍（有效12.8倍），引伸波幅21.6%。隻輪壽命唔算太長，溢價唔算平，但有高槓桿率戥住。
國泰C輪9839：油價下跌，國泰（293）直接受惠，當然可以諗吓國泰嘅C輪。
國泰C輪1隻手掌數晒，數據最靚嘅係9839，明年7月底到期，冇成交，按盤價1.24元，溢價5.8%，槓桿率10.8倍（有效6.3倍）。冇乜成交係隻輪最大缺點。明年6月到期嘅4482，輪價6.6仙，有少少成交，波幅會大過9839，不過溢價成8.9%，槓桿率20.2倍（有效8.5倍），引伸波幅25.4%。
章盛