荷李活巨星湯告魯斯（TomCruise）連日喺浙江西塘古鎮拍攝西片《職業特工隊3》外景，佢忙於拍戲之餘，亦無冷落同行大肚未婚妻姬蒂荷姆絲（KatieHolmes），足見佢哋真係好恩愛。
好似前日靚佬湯喺浙江同女角米雪蒙娜根（MichelleMonaghan）拍戲時，姬蒂就專程到場探班，靚佬湯重拖住女友行古鎮中嘅「送子來鳳橋」。
呢條橋就大有來頭啦，建於明崇禎十年，有三百六十八年歷史，傳說建橋時有一雀飛來，造橋者認為寓意吉祥，故取該名；後來該橋又被喻為情侶橋，情侶走此橋婚後必生貴子，又估唔到靚佬湯會對中國傳統咁有興趣。
而前晚靚佬湯又同姬蒂喺八保鑣護駕下，再次幫襯上海外灘3號嘅新視覺餐廳（NewHeights），但今次唔止兩公婆撐枱腳，連保鑣、工作人員等近九人迫爆原來坐兩個人嘅塔尖VIP包廂，而當姬蒂去洗手間時，重有兩名保鑣一前一後隨行護駕。
MaggieQ現身
到凌晨近一時，靚佬湯拖住女友離場，重滿臉笑容地同記者講咗聲「Hi」，然後就上車返酒店。
此外，有份主演《職3》嘅MaggieQ，噚晚八點幾亦喺湯告魯斯下榻嘅四季酒店現身，但佢似乎有啲攰，木無表情，喺幾名工作人員陪同下坐車離場。
