五十一歲躉船工人吳錦榮，在妻女眼中，是個顧家又盡責的「好丈夫、好爸爸」。本月中，阿榮在南丫島一艘躉船上工作時不幸遭貨櫃壓傷，送院後返魂乏術。突如其來的噩耗，令母女生活陷困。蘋果日報慈善基金撥款協助遺孀吳太辦理亡夫殮葬事宜。
吳太表示，阿榮的工作有一定危險性，已經常提醒他加倍小心，其夫向來亦注重工業安全。早前他經朋友介紹到南丫島躉船工作，詎料首天開工即發生意外。心情悲慟的吳太不停用紙巾拭淚：「好突然、根本唔相信呢件事，好似發咗一場夢，𠵱家瞓唔到覺，成日諗起以前嘅事……」
首天開工即遇意外
本月十七日，阿榮第一天到位於南丫島對開海面一艘躉船上開工，當時工人在躉船上將多個長貨櫃卸下，阿榮負責在接貨的躉船船艙內睇位，把吊下的貨櫃移至適當位置，其間阿榮突然被吊下貨櫃撞向胸腹及盆骨位置，再被推向另一個貨櫃，他慘被兩個貨櫃夾着，當場重傷，送院搶救無效。
阿榮從事躉船搬運工作逾二十年，吳太則在快餐店兼職，夫婦育有一名二十一歲女兒阿欣。
吳太雙眼通紅地說：「呢幾年想儲個錢都好困難，𠵱家一方面擔心冇錢搞先生嘅後事，另外又好擔心日後嘅生活，始終先生係屋企最大嘅經濟支柱，𠵱家佢走咗，將來生活都唔知點算。」
生前顧家愛錫妻女
吳太表示，夫婦結婚二十五年，在她眼中，阿榮是個照顧家庭的好丈夫。「先生好錫囡囡，好多嘢會以屋企人行先，佢為咗唔想我擔心，成日會鼓勵我，話三仔乸畀心機，一定可以支持落去。」
阿欣為了減輕雙親的經濟壓力，中七畢業後，近月覓得一份文員工作，晚間則進修商科課程。連日來，阿欣除了奔波辦理亡父的身後事，亦不時陪伴母親。
懂事的阿欣說：「𠵱家暫時放低唔開心嘅心情，盡力打點爸爸嘅後事，希望將來有機會進修多啲，因為想屋企環境好、媽咪生活得好啲，一定要讀多啲書、搵份好工。」
吳太無力替亡夫辦理身後事，蘋果日報慈善基金有見吳太的經濟困境，即時從「殮葬專戶」撥款二萬元，助她支付亡夫的殮葬費。
捐款編號：C1859
暖流熱線
電話：29908688
傳真：23702192
電郵：[email protected]
