剛剛榮升外父嘅張宇人係馬場常客，八方上周日已見佢入場，幫老友鄭強輝拉頭馬，噚日又見佢成家人齊齊入場，原來係幫自己隻「再戰群雄」打氣，結果險勝對手贏出，賽後張議員手拖愛妻，施施然響馬主廂房走落凱旋門拉頭馬，真係喜上加喜。張宇人話，「再戰群雄」今季延至今日先首次出賽，主要係隻馬八月開操時曾經擦傷，到九月尾又發現喉部有痰，被迫要食藥休息，到最近情況好轉先至報名，連佢自己都估唔到隻愛駒病癒復出就即刻贏馬咁犀利。
另一位馬主莎莎主席郭少明，噚日亦全家入場，佢隻「終身美麗」終點前影相險勝，其實郭少明頭場已應老友馬廷雄之邀，一齊幫「夢寐以求」拉過一場頭馬，換言之郭少明噚日一共拉咗兩次頭馬，認真旺！
傳真︰2623-9278
電郵︰[email protected]